गण य य य य
सूत्र iss iss iss iss
सुधा साधु बन्दै लिई पुष्प जाऊ
सुनौलो धरामा तिमी मुस्कुराऊ
सधैँ स्वच्छ बग्नू बनी दिव्य धारो
मलाई छ यो बुद्धको देश प्यारो ।।१
हिमाली दरामा रमेको छ हाँस
पहाडी गरामा फुलेको गुराँस
कतै ग्रीष्म गर्मी कतै ओस साह्रो
मलाई छ यो बुद्धको देश प्यारो ।।२
जहाँ गर्छ खेती मिलेरै किसान
त्यहीँ फल्छ राम्रो मकै इक्षु धान
सबैले भरेको छ धन्सार च्वारो
मलाई छ यो बुद्धको देश प्यारो।। ३
हिमाली पहाडी कतै छौँ मधेसी
कतै आर्य छेत्री कतै छौँ हलेसी
पृथक् धर्म भाषा यही रीति हाम्रो
मलाई छ यो बुद्धको देश प्यारो ।।४
मिली तीन रेखा बनेको त्रिकोण
छ झन्डा पृथक् विश्वमा नै सुवर्ण
कतै शैल अग्ला कतै फाँट सेरो
मलाई छ यो बुद्धको देश प्यारो।।५
✍️ डिल्लीराज घिमिरे (सङ्गम)
भूमिकास्थान ९ अर्घाखाँची
