मान्छे सफा छ दिलको नव भाव बोक्ने
उत्ताल ताल तलमाथि सबै समेट्ने !
विश्वास बिम्ब मनका मन छन् सितारा
खस्किन्छ दुर्व्यसनले शिर-शक्ति सारा!!
उल्का रहस्य दुनियाँ छ विशाल साल
भित्री भए नयन सौम्य सदा त्रिकाल!
बिक्दैन मानिस भने दिल दिव्य प्यारा
खस्किन्छ दुर्व्यसनले शिर-शक्ति सारा!!
सम्भाव्य भव्य भयमुक्त स्वभाव चर्का
हुन्छन् खरा नरम शीतल हुन्न बर्का !
चौडा छ वक्ष जसको नभको छ तारा
खस्किन्छ दुर्व्यसनले शिर-शक्ति सारा!!
चङ्गा भए मन मिठास मिजास हुन्छ
अग्लेर लक्ष्य उसले शिरमाथि छुन्छ!
हाँक्ने छ विश्व सजिलै नव क्रान्ति धारा
खस्किन्छ दुर्व्यसनले शिर-शक्ति सारा!!
बन्ने छ कल्पतरु ऊ जनजिन्दगीको
छर्दै सुवास सबमा हटी गन्दगीको !
हल्का न बन्दछ कतै मनकाव्य धारा
खस्किन्छ दुर्व्यसनले शिर-शक्ति सारा!!
लज्जा र त्रास जति छन् मन शुध्द बन्दा
जान्छन् सबै परपरै दिल बुध्द बन्दा !
उच्छाल छाल छलका जन शुक्र तारा
खस्किन्छ दुर्व्यसनले शिर-शक्ति सारा!!
नाँच्छन् धमाक जलअग्नि बली धरामा
सच्चा भए जनमनोगति कन्दरामा!
झर्ना झरे झररझैँ छ झकास पारा
खस्किन्छ दुव्यसनले शिर-शक्ति सारा!!
बन्छन् तिनै जन यता दीनका दिवार
हुन्नन् कतै असल चाल लिई सवार!
आस्था सकिन्छ यिनमा दयनीय पारा
खस्किन्छ दुर्व्यसनले शिर-शक्ति सारा!!
सच्चा सफा सजलका जलका विचार
सङ्ला सधैँ सकलमा सबका जुहार!
अग्ला उचा अबलका अझ हार हारा
खस्किन्छ दुर्व्यसनले शिर-शक्ति सारा!!
कलानिधि दाहाल
काठमाडौं
