हिसाब
मेरा लागि
जहिल्यै
दुर्गम पहाड बन्यो,
कहिले जाेडमा थाकेँ,
कहिले घटाउमा गलेँ,
कुनै गन्तव्यहीन
कठाेर यात्राजस्तो
गुणन बिग्रिँदाकाे थकान
भागा नमिल्दाकाे तनाव
लघुतम-महत्तमहरूमा
पसिना बगाउँदाकाे
चरम असन्तुष्टि
ज्यामितीय सूत्रहरू
रट्दाखेरिकाे हैरानी
अल्जेब्राका
गुणन जाेड वाई बराबरका
अर्थहीन उत्तर निकाल्न
गरेको दिमागी खर्च
मेरो जिन्दगी
हिसाबकाे उल्टाे यात्रामा
खुसी विरुद्ध
हिँड्दै थियो
निकै त्रासद,
बैङ्कमा खाेलिएकाे
मेराे खाता
भाेकले
जब दुब्लाउँदै गयो
म एकाएक
हिसाबकाे घाटैघाटा छाडेर
पसेँ कविताको
सघन झुपडीमा
आहा! कस्तो आनन्द !!
मनमा खुसीको
अतिरेक प्रवाह
भावकाे नदी,
कलाकाे हिमालय
अलङ्कारहरूकाे
अनुपम सौन्दर्य
ध्वनिकाे गाम्भीर्य
वक्राेक्तिकाे सुमधुर प्रहार
शैलीको मनाेहारिता
विम्बहरूकाे चमत्कार
प्रतीकहरूकाे अभिव्यञ्जना
रसकाे लाक्षणिक मिठास
यतिखेर म
जिन्दगीको
सजिलो अर्थ भेटेर
प्रसन्नताकाे
कलिलो अनुभूतिमा
रमाइरहेकाे छु !
डा. घनश्याम परिश्रमी
