विराटनगर । जल तथा मौसम विज्ञान विभागले मनसुनी प्रणाली सक्रिय भएकाले कोशी प्रदेशसहित देशका विभिन्न क्षेत्रमा आज र भोलि भारीदेखि धेरै भारी वर्षा हुन सक्ने जनाएको छ। विभागले बाढी, पहिरो, डुबान तथा नदी–खोलामा पानीको सतह बढ्ने जोखिम रहेकाले सर्वसाधारणलाई उच्च सतर्कता अपनाउन आग्रह गरेको छ।
विभागका अनुसार कोशी प्रदेशका पहाडी र तराईका संवेदनशील क्षेत्रमा मेघगर्जन, चट्याङसहित वर्षाको सम्भावना रहेकाले अनावश्यक आवतजावत नगर्न र आवश्यक पूर्वतयारी गर्न सुझाव दिइएको छ। मनसुनी वायु सक्रिय रहेकाले मौसमको अवस्थालाई निरन्तर निगरानी गरिरहेको विभागले जनाएको छ।
